Монголын нууц товчоонд өгүүлснээр, Есүхэй баатар хөвгүүн Тэмүжинг Хонгирад аймгийн Дэй сэцэнийд хүргэж, Бөртэтэй ураг барилдахаар тохиролцон “хүргэн талбиж” үлдээгээд буцсан тухай дурдагддаг.
Энэ нь ирээдүйн хүргэнээ охинтойгоо хамт байлгаж, зан чанар, хүмүүжил, ухаан, ёс жудгийг нь ажиглан сайн хань болох хүн мөн эсэхийг шинждэг эртний монгол заншил байжээ.
Монголчууд охиноо хадамд гаргахаасаа өмнө хүргэн хүний алсын хараа, холч ухаан, эв найрамдал, эрхэм ёсыг сахих чадварыг чухалчилдаг байсан бөгөөд охиныхоо ивээл жилтэй хүнийг сонгон ураг барилдахыг эрхэмд тооцдог байв. Түүнчлэн сайн морь, сайхан эд хэрэглэл, нум сум, хэт хутга, хөөрөг, гаанс зэрэг хэрэглэдэг зүйлээр нь хүртэл шинждэг байжээ.
Эртний монголчуудын хувьд гэрлэлт нь зөвхөн хоёр хүний бус, хоёр удмын холбоо учраас хүргэн хүнийг няхуур шинжиж, охиндоо сайн хань болох эсэхийг урьдчилан танин мэдэхийг хичээдэг байсан нь Монголын гэр бүлийн соёлын онцлогийн нэг юм.
Сэтгэгдэл